သမိုင်းတွင်အောင် သမိုင်းသင်ပါ

အမျိုးသားခေါင်းဆောင်ကြီး ဗိုလ်ချုပ်အောင်ဆန်းဖြစ်လာမည့် မောင်အောင်ဆန်းသည် ရေနံချောင်းမြို့ အမျိုးသားအထက်တန်းကျောင်းတွင် ၁၉၂၈ ခုနှစ်မှ ၁၉၃၂ ခုနှစ်အထိ ပညာသင်ကြားခဲ့သည်။ ထိုစဉ်က မောင်အောင်ဆန်း၏ ငယ်ဆရာများထဲတွင် ဆရာဦးကြွယ်စိုးလည်းပါဝင်ခဲ့သည်။

မောင်အောင်ဆန်းသည် အမျိုးသားအထက်တန်းကျောင်းမှ မြန်မာ(၁၀)တန်း အောင်မြင်ပြီးနောက်(၁၅) နှစ်အကြာ ၁၉၄၇ ခုနှစ်တွင် ဗိုလ်ချုပ်အောင်ဆန်းအဖြစ် ရေနံချောင်းသို့ ရောက်ရှိလာခဲ့သည်။ ရောက်ရှိလာခဲ့ သည့်အကြောင်းရင်းမှာ ဖက်ဆစ်ဆန့်ကျင်ရေးပြည်သူ့လွတ်လပ်ရေးအဖွဲ့ချုပ် (ဖဆပလ)၏ တာဝန်အရ မြန်မာပြည် လွပ်လပ်ရေးအတွက် စည်းရုံးဟောပြောရန်ဖြစ်သည်။

လူထုစည်းဝေးပွဲကို ထိုစဉ်က အစိုးရတန်းမြင့်ကျောင်း(ယခု အထက-၁)တွင် ကျင်းပခဲ့သည်။ ထိုကျောင်း၏ကျောင်းအုပ်ဆရာကြီးမှာ ဦးသံဗျင်ဖြစ်ပြီး ဗိုလ်ချုပ်၏အစ်ကို ဦးဘ၀င်းမှာ အထက်တန်းပြ ဆရာအဖြစ် တာဝန်ထမ်းဆောင်လျှက်ရှိသည်။

၁၉၄၇ခုနှစ် မတ်လ ၂၃ ရက်နေ့တွင် ကျောင်း၏ညောင်ညိုရိပ်၌မြို့ လူထုအား ညီညီညွတ်ညွတ်စည်းစည်း လုံးလုံးရှိစွာဖြင့် မြန်မာ့လွပ်လပ်ရေးကို အရယူကြရန် ဗိုလ်ချုပ်ကတိုက်တွန်းပြောကြားခဲ့သည်။ ဟောပြောမူ အပြီးတွင် ငယ်ဆရာဦးကြွယ်စိုးနှင့် ကျောင်းသားသမဂ္ဂ၏မေတ္တာရပ်ခံချက်အရကျောင်းစာသင်ခန်းများကို လှည့်လည်ကြည့်ရှုရသည်။ ထိုသို့လှည့်လည်ရင်း ကျောင်းသားကျောင်းသူများကို သြ၀ါဒပေးခဲ့သည်မှာ တန်ဖိုး ရှိလွန်းလှသဖြင့် အသက် ၇၀ ကျော် ၈၀ တွင်းရောက်နေပြီးဖြစ်သော ကျောင်းသားဟောင်းကြီးများ အဖို့ ယနေ့တိုင်မမေ့နိုင်ကြပေ။

စာသင်ခန်းတစ်ခုသို့ရောက်လာသော ဗိုလ်ချုပ်အောင်ဆန်းကို ကျောင်းသားကျောင်းသူများက မတ်တပ် ရပ်ကာ နူတ်ဆက်ကြိုဆိုကြသည်။ ဗိုလ်ချုပ်ကပြုံးရွှင်စွာဖြင့် ပြန်လည်နူတ်ဆက်ရင်းမေးလိုက် သည်.။ 

“အခု ဘာ ဘာသာသင်နေကြသလဲ”

“သမိုင်းဘာသာပါခင်ဗျ/ရှင်” 

“သမိုင်းဘာသာဆိုတာ အလွန်ကောင်းတဲ့ဘာသာပါ။ လူတွေအားလုံးသိသင့်ပါတယ်။ ဒါပေမဲ့ ရှင် ဘုရင်တွေ မွေးတဲ့နှစ်၊ သေတဲ့နှစ်၊ နန်းတက်တဲ့နှစ်၊ နန်ကျတဲ့နှစ်တွေကို သိရုံလောက်နဲ့တော့ မသင်ကြပါနဲ့။ 

သမိုင်းကိုလေ့လာပြီး ကိုယ်ဟာကိုယ့်နိုင်ငံအတွက် ဘယ်လိုအကျိုးရှိရှိလုပ်နိုင်မလဲ၊ ဘယ်လိုနေရာက ပါဝင်ရမလဲဆိုတာ သိအောင်ကြိုးစားသင်ယူဖို့လိုတယ်။

ဒါကြောင့် To learn history is to make history သမိုင်းသင်တာကောင်းတယ်။ သမိုင်းကို သင်လည်းသင်ကြပါ။ သမိုင်းတွင်အောင်လည်း လုပ်ကြပါ။ ”

“ နောက်တစ်ခုက အင်္ဂလိပ်စာကိုလည်း ကြိုးစားသင်ယူကြပါ။ အင်္ဂလိပ်ကို ဆန့်ကျင်တော်လှန်နေတာ ဟာ သူတို့ရဲ့ကိုလိုနီစနစ်၊ နယ်ချဲ့စနစ်ကိုသာ ဆန့်ကျင်တော်လှန်နေတာဖြစ်တယ်။ အင်္ဂလိပ်ဘာသာကို ဆန့်ကျင်ပစ်ပယ်ဖို့မဟုတ်ဘူး။ 

နောင်အနာဂတ်မှာ ပြင်သစ်ဘာသာထက် အင်္ဂလိပ်ဘာသာကလွှမ်းမိုးပြီး အသုံးကျလာမှာဖြစ်တဲ့ အတွက် အင်္ဂလိပ်ဘာသာကိုလည်းကြိုးစားသင်ယူကြပါ။”

“ ရှေ့ခရီးဆက်ဖို့နောက်ကျနေပြီ ဗိုလ်ချုပ်”

စီစဉ်သူများ၏သတင်းပို့မှုကြောင့်သာ စကားဖြတ်လိုက်ရသည်။ သူတို့သာ ဝင်မလာက မည်သို့သော အကြောင်းအရာများကို မည်မျှကြာအောင် ဟောပြောနေမည်မသိ။ တန်ဖိုးရှိသော ဆုံးမစကားများ ထပ်မံကျန်ရစ်မည်ကား မလွဲပေ။

ဗိုလ်ချုပ်၏လမ်းညွှန်ချက်များအရ နှစ်ပေါင်း ၆၀ ကျော်ပြီဖြစ်သော်လည်း ဒီနေ့တိုင်မှန်ခဲ့သည်။ မှန်နေဆဲ လည်း ဖြစ်သည်။ နောင်လည်း မှန်နေအုံးမည်ပင်။ 

မျိုးချစ်စိတ်ကိုပြုစုပျိုးထောင်ပေးခဲ့သောအမျိုးသားကျောင်းတွင်သမိုင်းဘာသာသင်ယူခဲ့သော မောင်အောင် ဆန်း သည် အမျိုးသားခေါင်းဆောင်ကြီးအဖြစ် သမိုင်းတွင်ခဲ့သည်။ 

ကျောင်းသားဘ၀က နယ်ချဲ့အင်္ဂလိပ်ကို မုန်းတီးသော်လည်း နန်းရင်းဝန်ဒေါက်တာဘမော်လို အင်္ဂလိပ် တော်အောင်ကြိုးစားခဲ့သော ဗိုလ်ချုပ်အောင်ဆန်း၏ အင်္ဂလိပ်စာအပေါ် ထားရှိသောအမြင်မှာ ယနေ့ခေတ် အင်္ဂလိပ်စာ တွင်ကျယ်မှုအခြေအနေနှင့် တစ်ထပ်တည်းကျနေပေသည်။ 

ကျေးဇူးတင် ဝန်ခံချက်

ရေနံချောင်းမြို့၊ အမှတ်(၁) အခြေခံပညာအထက်တန်းကျောင်း၊ ရာပြည်မဂ္ဂဇင်းပါ ကျောင်သားဟောင်းကြီးများဖြစ်ကြသော -

ဒုတိယဗိုလ်မှူးကြီးအံ့စိန် (အငြိမ်းစား) ၏“ နှစ်တစ်ရာသမိုင်းတစ်ကွက်နှင့် ဗိုလ်ချုပ်အောင်ဆန်း” ကျော်လွင် (ရေနံ့သာ) ၏ “ သမိုင်းဝင်စာအုပ်နှင့် သမိုင်းတင်ရန်ရှာပုံတော်”

မောင်အောင်သန်း၏ “ တွေ့မြင်ကြသိ မှတ်မိသမျှ ကျောင်းသားဘဝ” ဆောင်းပါးကို ဖတ်ရှုရသဖြင့် ဤစာကို ရေးနိုင်ခြင်းဖြစ်ကြေင်း ကျေးဇူးတင်ရှိစွာဖြင့် ဝန်ခံအပ်ပါသည်.။

                                                                                        ခင်လယ်လယ်ချစ် (မြန်/ဂုဏ်)